رعب

مين فينا ماجالووش وقت خاف فيه، مثلا و أنت صغير كسرت حاجة في البيت و مستني رد فعل ماما ...حاجات كدة كتير لكن الكلام ده و أنت صغير لكن دلوقتي أنت كبرت خلاص و انتقلت لمرحلة الرعب.
مثلا مثلا مش مذاكر كويس (ولا مذاكر مش هتفرق) و مستني ا­متحان من دكتور شرير برضو ممكن تعدي عادي لكن المشكلة هي الرعب المفاجئ يا ترى لو اترعبت فجأة هيكون رد فعلك إيه؟؟؟ هتجري؟؟؟ مش دايما تقدر تجري
من كام يوم كان أول محاضرة CTRL لنا و لسنة تالتة في نفس الوقت (طب ماحنا سنة تالتة لا أنت سنة رابعة ركز معايا) والدفعتين مستنيين الدكتور يا ترى مين يا ترى مين...كنا إحنا التلاتة مستنيين قدام باب الفصل أنا و هبة و نهال و نشوف مين بيقرب؟؟؟؟؟؟؟؟؟ دكتور نظام ثابت دم دام دم ذاااااام ....هيدخل لمين؟ إحنا..هما ...إحنا ...هما.. و من هول الموقف إحنا التلاتة دخلنا الفصل يا ترى عدى معداش عدى معداش
الفضول بقى أعدنا نتسحب نخرج نبص برا الفصل بمنتهى الشجاعة طبعا ، الدكتور مش برا هآآآآآآآآآآآ و فجأة الدكتور يخرج من ٢٠٤ و يوقف قدمنا مباشرة و يبصلنا و يقول لنا ادخلو مش أنتم سنة تالتة ... تخيل نفسك في الوضع ده و تخيل رد فعلك هاتجري؟ طبعا مينفعش ده دكتور نظام ثابت و واقف قدامك يعني أنت تقريبا لزقت فى الأرض و مش عارف حتى تتلفت طبعا أنا مش هعرف أوصف شكلي بس أقدر أقول إنه إحساس جديد جديد جديد، نهال من الصدمة كانت هتقول آه إحنا سنة تالتة و الحمد لله لم تنطق أنا متكلمتش برضو متكلمتش خااااالص متكلمتش بعدها نص ساعة بس هبة أنقذت الموقف و قالت لا إحنا سنة رابعة ... خلاص ... مشى... مشي ...طبعا الواحد hang up و مافاقش غير بعد الريستارت
ربنا يستر علينا الواحد معدتش أعصابه مستحمله .