عملت إيه في إمتحان الكمياء ... حليت إمتحان التاريخ كله صح

تعمل إيه لو دخلت إمتحان ال IS قالولك لا ده إمتحان SE هتعمل إيه؟ هتسيب اللجنة و تمشى؟ ولا هاتحاول تحل و زي ما تيجي تيجي؟؟

أو مثلا فاضل نص ساعة على إمتحان الكنترول و أنت كنت مفكر أول مادة NW هتذاكر؟ هاتنام و تبيع القضية ؟؟

طب لو بتمتحن و جوا اللجنة و أنت والورقة و الساعة و اذ فجئتن بإمتحان مشكل درس قراءة من اولي إعدادي على جغرافية خمسة إبتدائي و سؤال من كمياء ثانوية عامة

هو ده بالظبط أللي حصل في إمتحان ال NW

السؤال الأول والتاني مانكرش إنهم كانو NW بس كان في مشكلة من نوع تاني خالص إنو كان بيمتحن ذاكرة الطالب طبعا أنا عن نفسي محتاجة أزود رامات و أحط HD external

أنا يقولي MGP ده كان عبارة عن إيه طبعا أنا لو اشتبهت إني شفت الحروف دي بحاول أفتكر هي كانت في أنهو محاضرة و بعدين في أنهو حتة لا و مش مفروض تشرح المفروض تفتكر العناوين دا انا بنقل إسمي من الكارنيه لكن دايما الطالب بيدور لنفسه على العزاء إنو كويس في المسائل و حافظ القوانين برافو عليك

السؤال التاني علل و ده أول و أخر سؤال هاتحلو فاركز و اجب بضمير(و ليك الحرية تختارأجب أو جاوب)

السؤال الثالث دول المسائل لعبتك يا فندم... سيبوني ماحدش يمسكني .... ماحدش يمسكني ..... لا عادي ممكن حد يمسكني :D:D

إيه ده ؟.... ده مالو بالقوانين والشيتات .....لا لا لا إحنا هانستسلم ولا إييييه مش من سمات مهندس الكمبيوتر ... أنا جدع .... أنا شاطر ... أنا مش خايب ...أنا برافو علي .... أنا عيل بس أروح لأمي

طب إيه يعني مسألة ولا إتنين أللي بعدو إحنا هايهمنا؟؟؟ المسألة أللي بعدها probability طب أنا كنت شاطرة في ال probability لكن إيه ده ؟؟ أنا أصلا مش عارفة إيه علاقة المطاليب بالمعطيات طب و هتفرق في إيه إذا كانت ل دات 1001010111 ولا 1111000101 ......دايما دايما دايما أحب أفكارك ن صحتك بالدنيا أهم حاجة نافساوياتاك (د زي معنوياتك كدة)

ألي بعدو السؤال ده مش كان OR ؟؟ طباعا لولا ال OR ماكانش زمان عمري فكرة إني أحله فاضل سؤال هانت يلا أقرا السؤال.... مش فاهم.... أقراه تاني... مش فاهم و بعدين؟ أنا بقول أرجع أتأكد من ال give reason .

السؤال هو إيه علاقة الامتحان باللي كان بيحصل طول السنة ... هي علاقة تاراسوبيا تيشنولوكيا موكتالاكا ممتدة من مدي غيظ الدكتور منك طول السنة و كله بيطلع في الغسيل منور يا باشا :D

طبعا أنت فرحان خلصت ال NW أخر مادة كبيرة عندك ... فضلك يومين و تبقى خلصت أخر أول ترم ... و بعدين ؟ .....يسيبوك كدة تروح مبسوط؟؟ .... لا طبعا إمتحان الاقتصاد تأجل عشان تذكر إقتصاد كويس مش كفاية العك أللي عكيتو في الأربع إمتحانات أللي فاتو؟؟؟ طبعا أنا طالب مجتهد فهمشى دلوقتي عشان أذكر الإقتصاد كويس (^_~)